الفرق بين المنشأة الفردى و شركة الشخص الواحد

لفرق بين المنشأة الفردي وشركة الشخص الواحد

١- بالنسبة لاسم الشركة :

شركة الشخص الواحد لازم اول خطوة فيها شهادة عدم الالتباس و الشهادة دى بتضمن عدم تكرار اسم الشركة و الشهادة دى بنجيبها من السجل التجارى و خطوة اولى و اساسية فى تأسيس جميع انواع شركات الاموال وشركات الشخص الواحد  ,,,

اما المنشأة الفردى مش بنجيب شهادة التباس من السجل التجارى وممكن اسم الشركة يبقى مكرر و متشابه مع اسامى  شركات تانية ..

٢- بالنسبة للتحول الي شركة :

شركة الشخص الواحد ممكن تتحول لشركة بقرار اداري من صاحب الشركة وممكن تتحول لشركة ذات مسؤولية محدودة ( ذ م م ) او شركة مساهمة

اما المنشاة الفردي  لايمكن تتحول الي أي نوع من أنواع الشركات بأي حال من الأحوال

٣- بالنسبة لمقر الشركة :

بالنسبة لشركة الشخص الواحد ممكن تتأسس اول سنة بدون مقر ,,,

 اما المنشأة الفردي لازم يكون في مقر واول خطوة من خطواتها عقد ايجار مثبت التاريخ حتي لو مقر افتراضي ( مكتب مشترك )

4- بالنسبة لمعاينة الضرايب :

بالنسبة لشركة الشخص الواحد اول مرة مش بيبقى فى معاينة ضرايب لمدة سنة كاملة ,,,

اما بالنسبة للمنشأة القردى بيكون فى معاينة ضرايب اول سنة

5 – الذمة المالية

بالنسبة لشركة الشخص الواحد بتتعامل معاملة شركات الاموال بمعنى ان ذمتك المالية كصاحب شركة شخص واحد منفصلة تماما عن ذمة الشركة المالية بمعنى تانى لو في ضرايب على الشركة او ديون لاقدر الله بتكون اموالك الخاصة فى امان و منفصلة تماما عن الديون اللي على الشركة  ,,,

وده بعكس المنشأة الفردى فذمتك المالية و ذمة المنشأة واحدة لاينفصلان ولو المنشأة مش عارفة تسد اللى عليها بقي دين عليك شخصى

6- المحاسبة الضريبية

شركة الشخص الواحد بتتحاسب محاسبة ضريبية  و بتتعامل فى النقطة دي زى شركات الاموال يعنى بيتاخد من صافى ربح الشركة 22,5% ,,,

اما المنشأة الفردى بتتعامل شرايح  من حيث المحاسبة الضريبية

7- من حيث تصفية الشركة  :

تصفية شركة الشخص الواحد بتكون ليها اجراءات اطول اكتر من المنشأة الفردى و بتكون مكلفة شوية اكتر من المشأة الفردي

8- بالنسبة لايداع رأس المال :

بالنسبة لشركة الشخص الواحد لازم تعمل ايداع لكامل رأس المال بشهادة  وبتسترده تاني بعد استخراج السجل التجاري بيومين ,,,

اما المنشأة الفردي اللي خارج هيئة الاستثمار مش بتعمل اي ايداعات لرأس المال في البنك

9- بالنسبة للاستعلام الامني لبعض الانشطة زي التسويق العقاري ومراكز التدريب والدعاية والاعلان واي نشاط متعلق بالانترنت:

في شركة الشخص الواحد مش بيكون في استعلام امني علي الشخص صاحب الشركة

اما المنشأة  الفردي بيتعمل علي الشخص استعلام امني بياخد من ٣ شهور ل ٦ شهور لحين استخراج السجل التجاري